4. Şirkətlər özləri bizi pirat məhsullardan istifadə etməyə məcbur edirlər.
Dayanın... bir dəqiqə, üstümə hücum çəkmədən öncə arqumentlərimə qulaq verin.
Deməli illərdir adaptasiyasını gözlədiyim junji itonun uzumaki manqası nəhayət bu ilin 28 sentyabr tarixində yayımlanacaq. ancaq təxmin edin harada : hələ də azərbaycan və digər əldə ölən ölkələrə servisi olmayan hbo maxdə. həm aylıq 2 ayrı yerə ödəniş etməmək üçün, həm də bir sıra təhlükəsizlik problemlərinə görə vpn də istifadə etmirəm, bəs mən nə etməliyəm indi? dəliqanlı kimi pulunu verib servisi də ala bilmirik. lap streaming servisi alsaq belə müxtəlif problemlərlə üzləşirik: keçən il the boys serialına amazon prime üzərindən baxırdım, o qədər senzura tətbiq edilmişdi ki, abonəliyimi ləğv etdim, bu il isə sezona pirat internet saytları üzərindən baxdım, rahat, senzurasız. netflix üzərindən nəyi isə high resolution izləmək üçün gərək əlavə pul ödəyəsiniz. üstəlik netflix original adı ilə çıxan bir sıra serial və filmlər daha sonra başqa platformlara satılıb deyə, artıq onları netflix üzərindən izləyə bilmirsiniz.
Ümumiyyətlə streaming servislər sizin nəyi isə almağınızı deyil, onlara bağlı qalmağınızı, aylıq ödənişlər etməyinizi, yalnız qabağınıza qoyulanla zəhərlənib doymağınızı gözləyir, ki bu platformların da sayı n qədərdir. hər film üçün gərək ayrı bir yerə abunə olasan. hətta bəzən seriallar üçün belə : məsələn, vinland saga ilk sezonunda amazon prime üzərindən yayımlanmışdı, indi isə netflixə sürüşdürüblər. Üstəlik yayımlanan işlərin də keyfiyyəti və səviyyəsi də heç ürək açan deyil, biz guya səviyyəsiz telekanalların və reklamların caynağından qaçıb buralara gəlmişdik.

daha bir misal : keçən dəfə fransanın məşhur internet alver saytı fnac.comdan elektron kitab almışdım. alana qədər əsəb xəstəsi olmağım bir qırağa, pulunu verib aldığım ebooku yükləyə bilmirəm, başqa bir sayt olan rakuten kobo.com üzərindən oxumağa məcbur edilirəm. ki, orada da kitabı oxumaq üçün zibil günündə şərait qurublar. fnac.com azərbaycana shipping etmədiyi üçün, qeydiyyat ünvanı olaraq fransada random bir ünvan seçməli oldum. elektron formatda aldığım məhsul üçün belə ünvan, poçt ünvanı və digər şəxsi məlumatları qeyd etməli oluram. aldığım məhsul sonradan saytda görünmədi, daha sonra isə fnac və kobo hesablarını bir-birinə bağlamağım tələb olundu. sayt çökdü, məcbur birinə pc-dən, digərinə telefondan bağlanmalı oldum. google üzərindən qeydiyyatdan keçdiyimə görə, hesabların sinxronizasiyası üçün, hər iki saytda da parolu yenidən dəyişməli oldum. 2 saat sonra, pul verib aldığım, yükləyə bilmədiyim və formatının nə olduğundan əmin olmadığım kitabı oxuya bildim. ebook tanrılarına and olsun ki, axtardığım kitab hər hansı pirat saytda mövcud olsa idi, düşünmədən oradan istədiyim formatda endirərdim. həm pul verib məhsul alıram, həm oxuyana qədər nə qədər əziyyət çəkirəm.

gələk oyun məsələsinə. blu-ray dövrü yavaş-yavaş bitdiyi üçün, artıq demək olar ki, bütün oyunlar steam, epic, playstation store və s. üzərindən, yalnız online alına bilir. almaq düzgün ifadə olmadı əslində, biz bu oyunları icarəyə götürük sadəcə, nə vaxtsa bu sistemlər çöksə və ya satıcı firma ləğv edilsə, o platform üzərindəki oyunlara çatmaq mümkün olmayacaq, hansı ki, vaxtında heç də az olmayan məbləğdə pul ödənilib, alınıb. Bəzi oyunları offline olaraq steam üzərindən oynamaq mümkün deyil, gərək online olaraq sistemin özünə daxil olasan.
playstationın azərbaycana və digər geridə qalmış, sorry, inkişaf etməkdə olan ölkələrə servisi olmadığına görə, yalnız başqa ölkələrin gift kartları ilə (ya da başqa üsullarla) alına bilir, bu da qiymətə təsir edir əlbəttə. yeni dövr oyunların da qiyməti heç də az bir məbləğ deyil.
bir sıra oyunlar artıq heç bir platformda satılmır, hər yerdən yığışdırıblar və sən onları oynamaq üçün məcbursan müraciət edəsən utorrentə.

yaxşı indi neyləsin bu camaat? mən hər hansı bir kitabı oxumaq, filmə və ya seriala baxmaq, oyun oynamaq üçün pirat istifadə etməyə məcbur edilirəm. servisi olan platformlardan isə aldığım məhsulları həmişəlik ala bilmirəm, sadəcə icarəyə götürürəm, aldığım servis də bəzən pirat saytlardan daha keyfiyyətsiz xidmət göstərir. əvvəllər pc proqramlarını ömürlük alardıq, indi isə hər birinə ayrı abunəlik sistemi gətiriblər, dədələrinin qiymətini qoyublar (məsələn : adobe və ya office). vaxtilə pirat oxuduğum kitabların, oynadığım oyunların, tapa bildiklərimin hamısını sonradan pul verib almış, yəni original əsərə və müəllifə hörməti olan, piratı oğurluq hesab edən mən belə, artıq pirata keçirəm, bu işlərin də başını buraxıram.